Isa 60 | NdeIBE | STEP | “Vuka, khazimula, ngoba ukukhanya kwakho sekufikile, lenkazimulo kaJehova iyavela phezu kwakho.

Isaiah 60

Inkazimulo yaseZiyoni

1 “Vuka, khazimula, ngoba ukukhanya kwakho sekufikile, lenkazimulo kaJehova iyavela phezu kwakho.

2 Khangela, umnyama wembese umhlaba, umnyama omkhulu usibekele abantu. Kodwa uJehova uyakhanya phezu kwakho lenkazimulo yakhe iyabonakala phezu kwakho.

3 Izizwe zizakuza ekukhanyeni kwakho, lamakhosi alande ukuqhama kokusa kwakho.

4 “Phakamisa amehlo akho ukhangele macele wonke: bonke babuthana beze kuwe; amadodana akho avela khatshana, lamadodakazi akho athwelwe ngengalo.

5 Ngakho uzakhangela ubobotheke ngokujabula. Inhliziyo yakho izatshaya ikhukhumale ngenxa yentokozo; inotho yasolwandle izalethwa kuwe, lenotho yezizwe izakuza kuwe.

6 Imihlambi yamakamela izagcwala elizweni lakho, amakamela asakhulayo aseMidiyani lase-Efa. Wonke avela eSheba azakuza ethwele igolide lempepha ememezela udumo lukaJehova.

7 Yonke imihlambi yaseKhedari izabuthelwa kuwe; izinqama zaseNebhayothi zizakusiza; zizakwamukeleka njengeminikelo e-alithareni lami, njalo ngizahlobisa ithempeli lami elilodumo.

8 “Ngobani laba abandiza njengamayezi lanjengamajuba esiya ezidlekeni zawo na?

9 Ngeqiniso izihlenge zithembe mina; ekhokheleyo yimikhumbi yaseThashishi, iletha amadodana akho avela khatshana, lesiliva sawo kanye legolide ukuba kudunyiswe uJehova uNkulunkulu wakho, oNgcwele ka-Israyeli, ngoba ukunike inkazimulo.

10 “Abezizwe bazayakha futhi imiduli yakho, lamakhosi abo azakukhonza. Lanxa ekuthukutheleni kwami ngakutshaya, kodwa ngomusa wami ngizakuba lesihawu kuwe.

11 Amasango akho azahlala evulekile; kawayikuvalwa emini loba ebusuku ukuze abantu bakulethele inotho yezizwe – amakhosi azo ekhokhelwe ludwendwe lokunqoba.

12 Ngoba isizwe kumbe umbuso ongayikukukhonza uzatshabalala; uzachitheka uphele nya.

13 “Udumo lwaseLebhanoni luzakuza kuwe; zonke izihlahla, ezamapulanka, umfiri lomsipresi, ukuzahlobisa indlu yami engcwele; lendawo yezinyawo zami ngizayenza ikhazimule.

14 Amadodana abacindezeli bakho azakuza akhothame phambi kwakho. Bonke abakweyisayo bazakhothamela phansi ezinyaweni zakho, njalo bazakubiza ngokuthi iDolobho likaJehova, iZiyoni yakhe oNgcwele ka-Israyeli.

15 “Lanxa ubulahliwe, uzondakala, kungekho ohamba edabula phakathi kwakho, ngizakwenza ube ligugu elingapheliyo, uthokozise izizukulwane zonke.

16 Uzanatha uchago lwezizwe, umunyiswe emabeleni asesikhosini. Lapho-ke uzakwazi ukuthi nginguJehova, nginguMsilisi wakho, uMhlengi wakho, uMninimandla kaJakhobe.

17 Esikhundleni sethusi ngizakulethela igolide, lesiliva esikhundleni sensimbi. Esikhundleni sezigodo ngizakulethela ithusi, lensimbi esikhundleni samatshe. Ngizakwenza ukuthula kube ngumbusi wakho, lokulunga kube yinkosi yakho.

18 Akusayikuba lodlakela elizweni lakho, akusayikuba khona ukuchitheka loba ukutshabalala phakathi kwelizwe lakini, kodwa uzakuthi imiduli yakho yiNsindiso, lamasango akho uthi yiNdumiso.

19 Ilanga kalisayikuba yikukhanya kwakho emini loba ukukhanya kwenyanga kukukhanyise, ngoba uJehova uzakuba yikukhanya kwakho okungapheliyo, loNkulunkulu wakho abe yinkazimulo yakho.

20 Ilanga lakho kaliyikutshona futhi, lenyanga yakho ayisayikufiphala njalo. UJehova uzakuba yikukhanya kwakho okungapheliyo, lezinsuku zakho zezinsizi zizaphela.

21 Lapho-ke bonke abantu bakho bazakuba ngabalungileyo, lelizwe lizakuba ngelabo kokuphela. Bangamahlumela engawahlanyelayo, umsebenzi wezandla zami, ukuba ngibonakalise inkazimulo yami.

22 Ingcosana yakho izakuba yinkulungwane, abancinyane bazakuba yisizwe esilamandla. Mina nginguJehova; ngesikhathi esifaneleyo lokhu ngizakwenza ngokuphangisa.”